Help us in our pursuit for high-quality journalism!
Our commitment to uncovering requires your backing. Support our fearless investigative reporting, in-depth analyses and community voices. Donate now to strengthen the editorial independence and provide open access content to all.
Support Keraleeyam Choose your preference
₹1000/Year
₹2000/2 Years
₹500Students/Year
A contribution of any size
ഭരണകൂടങ്ങൾ ‘വികസനം’ എന്ന പേരിൽ കടലിലും കടൽ തീരത്തും നടത്തുന്ന എല്ലാ പദ്ധതികളും, കടലിനെ ആശ്രയിച്ച് ജീവിക്കുന്ന മത്സ്യത്തൊഴിലാളികളുടെ ജീവിതത്തെ പ്രതികൂലമായി ബാധിക്കുന്നവയാണ്. കടലിനേയും കടൽ വിഭവങ്ങളേയും ആശ്രയിച്ച് ജീവിക്കുന്നവരാണ് മത്സ്യത്തൊഴിലാളികൾ. കടലും കടൽത്തീരവും കോർപ്പറേറ്റുകൾക്ക് തീറെഴുതുന്ന ഭരണകൂടങ്ങൾക്ക് മത്സ്യത്തൊഴിലാളികളുടെ ഭാവിയെക്കുറിച്ച് യാതൊരു ചിന്തയുമില്ല. കടൽ വിഭവങ്ങൾ യാതൊരു നിയന്ത്രണവുമില്ലാതെ കോർപ്പറേറ്റുകൾക്ക് യഥേഷ്ടം ചൂഷണം ചെയ്യാൻ തക്ക വിധമാണ് ഭരണകൂടങ്ങൾ ഓരോ പദ്ധതികളും ആവിഷ്കരിക്കുന്നത്. ഇതിന്റെ ഏറ്റവും അവസാനത്തെ ഉദാഹരണമാണ് കേരള തീരത്ത് കടലിൽ ഖനനം നടത്തി നിർമ്മാണാവശ്യങ്ങൾക്കുള്ള മണ്ണെടുത്ത് വില്പന നടത്താൻ സ്വകാര്യ കമ്പനികൾക്ക് കേന്ദ്ര സർക്കാർ നൽകുന്ന അനുമതി. കേന്ദ്ര സർക്കാർ അംഗീകരിച്ച് നടപ്പിലാക്കികൊണ്ടിരിക്കുന്ന ‘ബ്ലൂ ഇക്കോണമി’യുടെ ഭാഗമായാണ് ഈ പദ്ധതി നടപ്പിലാക്കുവാൻ ഉദ്ദേശിക്കുന്നത്. ജനുവരി 11,12 തീയതികളിൽ കൊച്ചി റിനൈ സെന്ററിൽ വെച്ച് കേന്ദ്ര മൈനിങ് മന്ത്രാലയം നടത്തിയ ശില്പശാലയിലും റോഡ് ഷോയിലും ഇത് സംബന്ധിച്ച കൂടുതൽ വിവരങ്ങൾ വ്യക്തമാക്കുകയുണ്ടായി.
ജിയോളജിക്കൽ സർവ്വേ ഓഫ് ഇന്ത്യയുടെ മറൈൻ ആൻഡ് കോസ്റ്റൽ സർവ്വേ ഡിവിഷൻ നടത്തിയ പഠനത്തിൽ, ഇപ്പോൾ തന്നെ കേരളതീരത്തെ കടലിൽനിന്ന് 745 മില്യൺ ടൺ നിർമ്മാണവശ്യങ്ങൾക്കുള്ള മണൽ ഖനനം ചെയ്തെടുക്കാമെന്ന് പറയുന്നു. തീരദേശം മുതൽ 12 നോട്ടിക്കൽ മൈൽവരെയുള്ള ‘ഇന്ത്യൻ ടെറിട്ടോറിയൽ വാട്ടേഴ്‌സ്’ ഭാഗത്തും 12 നോട്ടിക്കൽ മൈലിനപ്പുറമുള്ള ഇക്കണോമിക് എസ്ക്ലൂസീവ് സോണിന്റെ ഭാഗത്തും ഈ മണൽ വിന്യാസമുണ്ടെന്ന് പഠനത്തിൽ കണ്ടെത്തിയതായി പറയുന്നു. ഈ മണൽ ഖനനം ചെയ്തെടുത്ത് വില്പനനടത്തുന്നതിന് താല്പര്യമുള്ള സ്വകാര്യ കമ്പനികളിൽ നിന്ന് താല്പര്യപത്രങ്ങൾ ക്ഷണിച്ചിട്ടുണ്ട്. ഫെബ്രുവരി 18 ന് അകം താല്പര്യപത്രം സമർപ്പിക്കാമെന്നും ഫെബ്രുവരി 28 ന് ടെണ്ടർ നടപടികൾ പൂർത്തിയാകുമെന്നും സർക്കാർ പറയുന്നു.
പുറംകടൽ ധാതുഖനനവുമായി ബന്ധപ്പെട്ട 2002ലെ കടൽ മേഖല ധാതു (വികസനവും നിയന്ത്രണവും) നിയമം 2023ൽ ബ്ലൂ ഇക്കോണമിയ്ക്ക് വേണ്ടി ഭേദഗതി ചെയ്തതിന്റെ ഭാഗമായാണ് കടൽ ഖനന മേഖലയിലേക്ക് സ്വകാര്യ സംരംഭകർക്ക് അനുമതി നൽകിയത്. കേരളത്തിൽ നിർമ്മാണാവശ്യങ്ങൾക്കായി ഒരു വർഷം 30 മില്യൺ ടൺ മണൽ വേണമെന്ന് കണക്കാക്കപ്പെടുന്നു. അതായത് 25 വർഷത്തേക്ക് കേരളത്തിലെ നിർമ്മാണാവശ്യങ്ങൾക്കുള്ള മണൽ ഒന്നാം ഘട്ടത്തിൽ തന്നെ കടൽ ഖനനം ചെയ്തെടുക്കാമെന്ന് ജിയോളജിക്കൽ സർവ്വേ ഓഫ് ഇന്ത്യ കണക്കുകൂട്ടുന്നു. കാലാകാലങ്ങളിൽ സമുദ്രനിരപ്പിൽ ഉണ്ടായ മാറ്റത്തിന് അനുസൃതമായി സമുദ്രത്തോട് ചേരുന്ന നദികളുടെ വിന്യാസത്തിനനുസരിച്ച് അവ നിക്ഷേപിച്ച മണൽ സഞ്ചയങ്ങളാണ് ഓഫ്‌ഷോർ മണൽ നിക്ഷേപങ്ങളായി കണ്ടെത്തിയിട്ടുള്ളത്. കേരള തീരത്തിന്റെ ഭാഗമായ അഞ്ച് പ്രധാനപ്പെട്ട മേഖലകളാണ് നിലവിൽ മണൽ സഞ്ചയങ്ങളായി കണ്ടെത്തിയിട്ടുള്ളതായി ജിയോളജിക്കൽ സർവ്വേ ഓഫ് ഇന്ത്യ പറയുന്നത്. പൊന്നാനി സെക്ടർ, ചാവക്കാട് സെക്ടർ, ആലപ്പുഴ സെക്ടർ, കൊല്ലം വടക്ക് സെക്ടർ, കൊല്ലം തെക്ക് സെക്ടർ എന്നിവയാണ് അവ. ഈ മേഖലയിൽ കടലിൽ ഏകദേശം 48 മീറ്റർ മുതൽ 62 മീറ്റർ വരെ ആഴത്തിൽ മണൽനിക്ഷേപമുണ്ടെന്ന് പഠനത്തിൽ പറയുന്നു.
കേരളത്തിലെ പ്രധാനപ്പെട്ട കായലുകളും നദികളുമായ പറവൂർ കായൽ, അഷ്ടമുടി കായൽ, കായംകുളം കായൽ, പമ്പാ നദി, വേമ്പനാട് കായൽ, പെരിയാർ, ചാലക്കുടിപുഴ, ഭാരതപ്പുഴ എന്നിവ കടലിൽ പതിക്കുന്ന സ്ഥലങ്ങളോ അവയോട് ചേർന്നുള്ള പ്രദേശങ്ങളോ ആണ് ഇപ്പോൾ സെക്ടറായി കണക്കായിട്ടുള്ള മേഖലകൾ. കേരളത്തിലെ 41 നദികൾ പടിഞ്ഞാറോട്ടൊഴുകി, ഒറ്റയ്ക്കോ, മറ്റുള്ളവയുമായി ചേർന്നോ കടലിൽ പതിക്കുന്നവയാണ്. ഈ നദികളും കായലുകളും വഹിച്ചുകൊണ്ടുവരുന്ന മണലുകളും, കാറ്റ് തിരമാല സമുദ്രജലപ്രവാഹങ്ങൾ കടലിലെ നീരൊഴുക്കുകൾ വേലിയേറ്റം-വേലിയിറക്കം എന്നിവയുടെ ഫലമായി ഒഴുകിയെത്തുന്നതുമായ മണലുകളും ദീർഘാനാളുകളായി അടിഞ്ഞുകൂടിയാണ് കടലിന്റെ അടിത്തട്ടിൽ മണൽ ബ്ലോക്ക് രൂപംകൊള്ളുന്നത്.
കോർപ്പറേറ്റുകൾക്ക് മാത്രം സാമ്പത്തികനേട്ടം ഉണ്ടാക്കാൻ ഉതകുന്ന മണൽ ഖനന പദ്ധതി, കടലിന്റെ ജൈവ വൈവിധ്യത്തെയോ, ആവാസ വ്യവസ്ഥയെയോ, കടലും കടൽ തീരവുമായി ബന്ധപ്പെട്ട് ജീവിക്കുന്ന മത്സ്യത്തൊഴിലാളികളുടെ സാമൂഹ്യ-സാമ്പത്തിക അവസ്ഥയെയോ ഒട്ടും പരിഗണിക്കുന്നില്ല. നമ്മുടെ കടലും കടൽ തീരവും അതീവ ലോല പരിസ്ഥിതി പ്രദേശമാണ്. അവിടെ നടത്തുന്ന ഏതൊരു ചെറിയ ഇടപെടൽ പോലും കടൽ പരിസ്ഥിതിയിലും, കടൽ ജീവികളുടെ ആവാസ വ്യവസ്ഥയിലും ഗുരുതരമായ പ്രതിസന്ധികൾ സൃഷ്ടിക്കും. കടലിൽ നടത്തുന്ന മണൽ ഖനനം മത്സ്യസമ്പത്തിനേയും, മത്സ്യത്തൊഴിലാളികളുടെ ജീവിതത്തേയും ഏറെ പ്രതികൂലമായി ബാധിക്കും. ആദ്യഘട്ടത്തിൽ ഖനനത്തിനായി ഉദ്ദേശിക്കുന്ന അഞ്ച് സെക്ടറുകളും മത്സ്യസമ്പത്തിന്റെ കലവറകളാണ്.
ലോകത്തിലെ തന്നെ ഏറ്റവും വലിയ മത്സ്യ ആവാസകേന്ദ്രമായ കൊല്ലം കടൽതിട്ട (കൊല്ലം പരപ്പ്) കൊല്ലം സൗത്ത്, കൊല്ലം നോർത്ത് സെക്ടറുകളിൽ ഉൾപ്പെടും. കൊല്ലം ജില്ലയിലെ പറവൂർ മുതൽ ആലപ്പുഴ ജില്ലയിലെ തോട്ടപ്പള്ളിവരെ ഏകദേശം 3300 ചതുരശ്ര കിലോമീറ്റർ വീസ്തീർണ്ണത്തിലും, 275 മീറ്റർ മുതൽ 375 മീറ്റർ വരെ ആഴത്തിലും വ്യാപിച്ചുകിടക്കുന്ന കൊല്ലം കടൽതിട്ട (കൊല്ലംപരപ്പ്) കണവ, കൊഞ്ച്, വിവിധയിനം ചെമ്മീൻ വർഗ്ഗങ്ങൾ, കലവ, മത്തി, അയല, ചൂര, വേളാ, നെയ്മീൻ തുടങ്ങി പോഷകമൂല്യവും വാണിജ്യമൂല്യവും ഏറെയു ള്ള മത്സ്യങ്ങളുടെ ആവാസ കേന്ദ്രമാണ്. കടൽഖനനത്തിന്റെ ഫലമായി ഈ കടൽതിട്ടയും, ആവാസവ്യവസ്ഥയും പൂർണ്ണമായും നശിക്കും.
കരയിലെപോലെ തന്നെ ജൈവവൈവിധ്യങ്ങളാൽ സമ്പുഷ്ടമാണ് കടലും കടലിന്റെ അടിത്തട്ടും. സസ്യ പ്ലവകങ്ങൾ, ജന്തു പ്ലവകങ്ങൾ, മത്സ്യങ്ങൾ ഉൾപ്പെടുന്ന നീന്തൽ ജീവിവർഗ്ഗങ്ങൾ, മറ്റ് ജന്തു വർഗ്ഗങ്ങൾ എന്നിവ ഉൾപ്പെട്ടതാണ് കടലിലെ ആവാസവ്യവസ്ഥ. വലിയ യന്ത്രങ്ങളുപയോഗിച്ചു നടത്തുന്ന കടൽ ഖനനത്തിന്റെ ഭാഗമായി വെള്ളവും അടിത്തട്ടിലുള്ള ചെളിയും ചേർന്നു കലങ്ങുകയും ആ പ്രക്ഷുബ്ധതയുടെ ഭാഗമായി പ്രകാശ രശ്മികൾക്ക് കടലിന്റെ അടിത്തട്ടിലേക്ക് കടന്ന് പോകാൻ കഴിയാതെ വരികയും ചെയ്യും. ഇത് കടലിന്റെ അടിത്തട്ടിലുള്ള സസ്യ പ്ലവകങ്ങൾക്ക് പ്രകാശ സംശ്ലേഷണം നടത്താനും, കാർബൺ ആഗിരണം ചെയ്യാനും കഴിയാത്ത സാഹചര്യം സൃഷ്ടിക്കും. പ്രകാശ സംശ്ലേഷണം നടക്കാത്തതിനാൽ സസ്യ പ്ലവകങ്ങൾക്ക് പോഷണം ഉല്പാദിക്കാൻ കഴിയാതെവരികയും തന്മൂലം അവ നശിച്ചുപോകുകയും ചെയ്യും. കടലിലെ ജന്തു പ്ലവകങ്ങളുടെ ആഹാരമാണ് സസ്യ പ്ലവകങ്ങളും അവ ഉല്പാദിപ്പിക്കുന്ന പോഷണങ്ങളും. സസ്യ പ്ലവകങ്ങൾ നശിക്കുന്നതോടെ, മത്സ്യങ്ങളുൾപ്പടെയുള്ള നീന്തൽ ജീവികളുടെ ആഹാരമായ ജന്തു പ്ലവകങ്ങൾക്കും നാശം സംഭവിക്കുന്നു. ഇങ്ങനെ മത്സ്യങ്ങൾക്ക് അവയുടെ ആഹാര ശ്രേണി നഷ്ടമാകുകയും, മത്സ്യസമ്പത്തിന് ശോഷണം സംഭവിക്കുകയും ചെയ്യും.
കേരള സംസ്ഥാന പ്ലാനിംഗ് ബോർഡ് 2021ൽ പ്രസിദ്ധീകരിച്ച കേരള വികസന റിപ്പോർട്ട് പ്രകാരം സംസ്ഥാനത്തെ മത്സ്യ ഉപഭോഗം പ്രതിവർഷം ഏകദേശം 9.12 ലക്ഷം ടൺ, അതായത് പ്രതിദിനം ഏകദേശം 2000-2500 ടൺ ആണെന്ന് കണക്കാക്കപ്പെടുന്നു. ഇതിന്റെ ഏകദേശം 60 ശതമാനം മാത്രമാണ് നമ്മൾ ഉത്പാദിപ്പിക്കുന്നത്. സെൻട്രൽ മറൈൻ ഫിഷറീസ് റിസർച് ഇൻസ്റ്റിറ്റ്യൂട്ട് (സി.എം.എഫ്.ആർ.ഐ) നടത്തിയ പഠനമനുസരിച്ച് കേരളത്തിലെ മത്സ്യഉപഭോഗം ഇനിയും വർദ്ധിക്കാൻ സാധ്യതയുണ്ട്. അതുകൊണ്ടുതന്നെ, മത്സ്യസമ്പത്തിന്റെ ശോഷണത്തിന് കാരണമാകുന്ന ഏതെങ്കിലും ഇടപെടൽ കടലിലോ കടൽ തീരത്തോ നടത്തുന്നത് കേരളത്തിന്റെ ഭക്ഷ്യസുരക്ഷയേയും, ജനതയുടെ ആരോഗ്യത്തേയും പ്രതികൂലമായി ബാധിക്കുമെന്നുറപ്പാണ്.
ഖനനത്തിന്റെ ഭാഗമായി കടലിന്റെ അടിത്തട്ടിനെ ഇളക്കിമറിക്കുമ്പോൾ, അപകടകാരികളായ ഘനലോഹങ്ങളുടെ ലോഹാംശങ്ങൾ കടലിന്റെ ഉപരിതലത്തിലേക്ക് ഉയർന്നു വന്ന് കടൽ വെള്ളം പെട്ടെന്ന് മലിനമാകും. കൂടാതെ ലോഹാംശങ്ങൾ ഉപരിതല മത്സ്യങ്ങൾ ആഹരിക്കുകയും, മത്സ്യങ്ങളിലൂടെ അത് മനുഷ്യശരീരത്തിലെത്തുകയും ചെയ്യും. ഇത് മത്സ്യങ്ങളിലും, മനുഷ്യരിലും വലിയ ആരോഗ്യപ്രശ്നങ്ങൾ സൃഷ്ടിക്കും. കടൽമണൽ ഖനനം കൂടുതൽ നടക്കുന്ന ഇന്ത്യോനേഷ്യയിലായിരുന്നു സുനാമി ദുരന്തത്തിന്റെ പ്രവഹകേന്ദ്രമെന്നും ഇത്തരുണത്തിൽ ഓർക്കുക.
കടലിൽ നടത്തുന്ന മണൽ ഖനനം സമുദ്രജലപ്രവഹങ്ങളുടെ ഗതിയേയും, നീരൊഴുക്കിനെയും, വേലിയേറ്റം, വേലിയിറക്കം എന്നീ കടൽ പ്രതിഭാസങ്ങളേയും പ്രതികൂലമായി ബാധിച്ചേക്കാമെന്ന് സമുദ്ര ഗവേഷകനും കേരളാ യൂണിവേഴ്സിറ്റി ഫോർ ഫിഷറീസ് ആൻഡ് ഓഷ്യൻ സ്റ്റഡീസിന്റെ (കുഫോസ്) സ്ഥാപക വൈസ് ചാൻസിലറുമായിരുന്ന ഡോ. ബി മധുസൂദനകുറുപ്പ് ചൂണ്ടികാട്ടുന്നു. കടൽവെള്ളം കലങ്ങി വളരെവലിയ തോതിൽ കടലിൻ്റെ അടിത്തട്ടിൻ്റെ രൂപഭാവങ്ങൾക്ക് മാറ്റം സംഭവിച്ചാൽ സമുദ്രത്തിലെ ആഹാരവ്യവസ്ഥയെ മാത്രമല്ല, ദൂരപ്രദേശങ്ങളിലെയടക്കം കടലൊഴുക്കിനെയും കടൽത്തിരയെയും പോഷക വിതരണത്തെയും സാരമായി ബാധിക്കാം.
കടൽ ഖനനം ചെയ്തെടുക്കുന്ന മണലിൽ ഉപ്പിന്റെ അംശം വളരെ കൂടുതലായിരി
ക്കുന്നതിനാൽ അത് നിർമ്മാണ പ്രവർത്തനങ്ങൾക്ക് അനുയോജ്യമല്ലായെന്ന് പ്രമുഖ സമുദ്രശാസ്ത്രഞ്ജനും, ഗോവ നാഷണൽ ഇൻസ്റ്റിറ്റ്യൂട്ട് ഓഫ് ഓഷ്യനോഗ്രാഫിയുടെ ഡയറക്ടറുമായിരുന്ന ഡോ. ജി നാരായണസ്വാമി പറയുന്നു. ഈ മണൽ നിർമ്മാണ പ്രവർത്തനങ്ങൾക്ക് അനുയോജ്യമായ രീതിയിൽ ശുദ്ധീകരിച്ചെടുക്കുന്നതിന് ആവശ്യമായ ശുദ്ധജലത്തിന്റെ അളവ് വളരെ വലുതാണെന്നും, ഇപ്പോൾ തന്നെ ജലക്ഷാമം നേരിടുന്ന കേരളത്തിൽ മണൽ ശുദ്ധീകരിക്കാനുള്ള വെള്ളം എവിടെ നിന്ന് കിട്ടുമെന്നും ഡോ. ജി. നാരായണ സ്വാമി ചോദിക്കുന്നു.
കാലാവസ്ഥാ വ്യതിയാനത്തിന്റെ ഭാഗമായി അറബിക്കടലിൽ വലിയ തോതിൽ ചൂട് കൂടുന്നതായും, കൊടുങ്കാറ്റുകളുടെ പ്രവഭകേന്ദ്രങ്ങളായി അറബിക്കടൽ മാറുന്നതായും പഠനങ്ങൾ തെളിയിക്കുന്നു. ഇതും കടലിനെ ആശ്രയിച്ചു ജീവിക്കുന്ന മത്സ്യത്തൊഴിലാളികളുടെ ജീവിതം അനിശ്ചിതത്വത്തിലാക്കുന്ന ഘടകങ്ങളിലൊന്നാണ്. കാലാവസ്ഥാ വ്യതിയാനത്തിന്റേയും, സർക്കാരുകളുടെ തെറ്റായ നയങ്ങളുടേയും, കടലിലും കടൽ തീരങ്ങളിലും സർക്കാരുകൾ നടത്തുന്ന വൻകിട നിർമ്മാണങ്ങളുടേയും ഫലമായി ഇപ്പോൾ തന്നെ മത്സ്യസമ്പത്തിന് വലിയ തോതിൽ ശോഷണം സംഭവിച്ചുകൊണ്ടിരിക്കുകയാണ്. കേരളതീരത്ത് നിന്ന് മത്സ്യബന്ധനത്തിനു പോകുന്നവർക്ക് മിക്കപ്പോഴും മത്സ്യമൊന്നും ലഭിക്കാതെ വെറും കൈയ്യോടെ മടങ്ങിവരുന്ന സാഹചര്യമാണ് നിലവിലുള്ളത്. ഇന്ധനചെലവുപോലും ലഭിക്കാത്തതിനാൽ മത്സ്യബന്ധനത്തിന് പോകാതെ ബോട്ടുകളും, വള്ളങ്ങളും തീരങ്ങളിൽ കെട്ടിയിട്ടിരിക്കുന്ന കാഴ്ച സർവ്വ സാധാരണമാണ്. അങ്ങനെയുള്ളയൊരു സാഹചര്യത്തിൽ വീണ്ടും ഇത്തരമൊരു പദ്ധതികൂടി കൊണ്ടുവരുന്നത് മത്സ്യ ബന്ധനം ഉപജീവനമാക്കിയ ലക്ഷക്കണക്കിന് ആളുകളെ പട്ടിണി മരണത്തിലേക്ക് തള്ളിവിടും.
സവിശേഷ സാഹചര്യത്തിൽ ജീവിക്കുന്ന ജനവിഭാഗമാണ് കേരളത്തിലെ മത്സ്യത്തൊഴിലാളികൾ. അതുകൊണ്ടുതന്നെ പൊതുസമൂഹത്തിന്റെ ജീവിത നിലവാരത്തിനൊപ്പം മത്സ്യത്തൊഴിലാളികളുടെ ജീവിത നിലവാരത്തെ ഉയർത്തികൊണ്ട് വരുന്നതിനായി സ്റ്റേറ്റിന്റെ പ്രത്യേകമായ ശ്രദ്ധ ഉണ്ടാവേണ്ടത് അത്യന്താപേക്ഷിതമാണ്. സ്വാതന്ത്ര്യനന്തരം പൊതുസമൂഹം സ്വായത്തമാക്കിയ നേട്ടങ്ങളെല്ലാം, ആസൂത്രണ-വികസന നയങ്ങളുടെ ഫലമായി നിഷേധിക്കപ്പെട്ട, പിന്നാക്ക-ദരിദ്ര ജനവിഭാഗങ്ങളാണ് കേരളത്തിലെ മത്സ്യത്തൊഴിലാളി സമൂഹം. ഫിഷറീസ് വകുപ്പിന്റെ 2022-23 ലെ കണക്കനുസരിച്ച് 10.60 ലക്ഷമാണ് കേരളത്തിലെ മത്സ്യത്തൊഴിലാളി സമൂഹത്തിന്റെ ജനസംഖ്യ. ഇത് കേരളത്തിലെ മൊത്തം ജനസംഖ്യയുടെ 3.1 ശതമാനമാണ്. 8.16 ലക്ഷം ജനങ്ങൾ കടലോര മത്സ്യത്തൊഴിലാളി സമൂഹത്തിലും 2.44 ലക്ഷം ജനങ്ങൾ കായലോര മത്സ്യത്തൊഴിലാളി സമൂഹത്തിലും ജീവിക്കുന്നു. 222 കടലോര ഗ്രാമങ്ങളിലും, 113 കായലോര ഗ്രാമങ്ങളിലുമായി ഇവർ അധിവസിക്കുന്നു. കേരള മത്സ്യത്തൊഴിലാളി ക്ഷേമനിധി ഫണ്ട് ബോർഡിന്റെ 2022-23ലെ കണക്കനുസരിച്ച് 2,40,974 പേർ നേരിട്ട് മത്സ്യബന്ധന പ്രക്രിയയിലും 78,659 പേർ അനുബന്ധ മേഖലയിലും പണിയെടുക്കുന്നതായി കണക്കാക്കപ്പെടുന്നു. (അവലംബം: കേരളാ ഫിഷർമെൻ വെൽഫെയർ ഫണ്ട് ബോർഡ്, സാമ്പത്തിക അവലോകന റിപ്പോർട്ട് 2023, കേരള സംസ്ഥാന ആസൂത്രണ ബോർഡ്).
രാജ്യത്തിന്റെ സാമ്പത്തിക ഭദ്രതയ്ക്ക് ഉതകുന്ന വിദേശ നാണ്യം നേടിത്തരുന്നതിൽ മത്സ്യത്തൊഴിലാളികൾ വഹിക്കുന്ന പങ്ക് വളരെ വലുതാണ്. മറൈൻ പ്രൊഡക്ട് എക്സ്പോർട്ട് ഡെവലപ്മെന്റ് അതോറിറ്റി (എം.പി.ഇ.ഡി.എ.) യുടെ കണക്കനുസരിച്ച് 2022-23വർഷത്തിൽ 63969.14 കോടി രൂപയ്ക്ക് തുല്യമായ മൂല്യമുള്ള 17,35,286 മെട്രിക് ടൺ മത്സ്യം ഇന്ത്യ കയറ്റുമതി ചെയ്തു. ഇതിൽ കേരളത്തിന്റെ പങ്ക് യഥാക്രമം 8285.03 ഉം 2,18,629ഉം ആയിരുന്നു. ഇത് കൂടാതെ കേരളത്തിലെ പൊതുസമൂഹത്തിന് കുറഞ്ഞ ചെലവിൽ ഏറ്റവുമധികം പോഷകമൂല്യമുള്ള ആഹാരം ഉത്പാദിപ്പിച്ച് നൽകുന്നതിലൂടെ പൊതുസമൂഹത്തിന്റെ ആരോഗ്യത്തിലും, നാടിന്റെ ഭക്ഷ്യസുരക്ഷയിലും വലിയ പങ്കും മത്സ്യത്തൊഴിലാളികൾ വഹിക്കുന്നുണ്ട്. രാജ്യത്തിന്റെ സാമ്പത്തിക വളർച്ചയിലും, ഭക്ഷ്യ സുരക്ഷയിലും രാജ്യ സുരക്ഷയിലും വളരെയധികം സംഭാവന നൽകുന്ന ജനവിഭാഗമെന്ന നിലയിലും, സാമൂഹ്യ-സാമ്പത്തിക അവസ്ഥ കണക്കിലെടുത്തും പ്രത്യേക പരിഗണന ലഭിക്കേണ്ടവരാണ് മത്സ്യത്തൊഴിലാളികൾ. എന്നാൽ ആ നിലയിലുള്ള യാതൊരു പരിഗണനയും കേന്ദ്ര-സംസ്ഥാന സർക്കാരുകൾ മത്സ്യത്തൊഴിലാളികൾക്ക് നൽകിയിട്ടില്ല. അധികാരത്തിന്റെ പങ്കാളിത്തത്തിലും, പൊതുവിഭവങ്ങളുടെ വീതംവെപ്പിലും മത്സ്യത്തൊഴിലാളി സമൂഹത്തെ ബോധപൂർവം അവഗണിക്കുന്നു.
ഭരണകൂട നയങ്ങളുടെ ഭാഗമായി പാർശ്വവൽക്കരിക്കപ്പെട്ട ഒരു ജനതയുടെ മേൽ സർക്കാർ അടിച്ചേൽപ്പിക്കുന്ന മറ്റൊരു ദുരന്തമാണ് കടലിലെ മണൽ ഖനനം. ഇത് മത്സ്യത്തൊഴിലാളികളുടെ ജീവിതത്തെ മാത്രമല്ല, പൊതുസമൂഹത്തിന്റെ ആരോഗ്യത്തെക്കൂടി പ്രതികൂലമായി ബാധിക്കാൻ പോകുന്ന പദ്ധതിയാണ്. കേരളത്തിലെ ജനങ്ങളുടെ പോഷക ആഹാരത്തിനുകൂടി ഭീഷണിയായ ഈ പദ്ധതിയെ ചെറുത്തു തോൽപ്പിക്കുന്നതിന് മത്സ്യത്തൊഴിലാളികൾക്കൊപ്പം പൊതുസമൂഹവും കൂടി പങ്കുചേരേണ്ടതുണ്ട്.
